ប្រធានាធិបតីអ៊ុយក្រែនមកអាមេរិកម្ដងទៀតដើម្បីជំរុញបញ្ហាជំនួយ

ប្រធានាធិបតីអាមេរិកលោក Joe Biden បានអញ្ជើញសមភាគីអ៊ុយក្រែនលោក Volodymyr Zelensky ទៅកាន់ទីក្រុងវ៉ាស៊ីនតោន ដើម្បីពិភាក្សានៅថ្ងៃទី 12 ខែធ្នូ ខណៈដែលគណបក្សប្រជាធិបតេយ្យព្យាយាមឈានដល់កិច្ចព្រមព្រៀងនៅក្នុង សភា ដើម្បីផ្តល់ជំនួយបន្ថែមដល់ទីក្រុងគៀវ។

ប្រធានាធិបតីអ៊ុយក្រែន លោក Volodymyr Zelensky ក្នុងអំឡុងដំណើរទស្សនកិច្ចលើកដំបូងទៅកាន់សហរដ្ឋអាមេរិកក្នុងខែធ្នូ ឆ្នាំ២០២២។ រូបថត៖ AP

នៅក្នុងសេចក្តីថ្លែងការណ៍មួយកាលពីថ្ងៃទី 10 ខែធ្នូ អ្នកនាំពាក្យសេតវិមានលោកស្រី Karine Jean-Pierre បាននិយាយថា ក្នុងកិច្ចប្រជុំនេះ ប្រធានាធិបតី Biden និងសមភាគី Zelensky ត្រូវបានគេរំពឹងថានឹងពិភាក្សាអំពីតម្រូវការបន្ទាន់របស់អ៊ុយក្រែន និងសារៈសំខាន់នៃវិធានការគាំទ្ររបស់ទីក្រុងវ៉ាស៊ីនតោនសម្រាប់ទីក្រុងគៀវនៅពេលនេះ។

ទន្ទឹមនឹងនេះ ការិយាល័យប្រធានាធិបតីអ៊ុយក្រែនបានប្រកាសថា លោក Zelensky នឹងមកដល់ទីក្រុងវ៉ាស៊ីនតោន នៅថ្ងៃទី 11 ខែធ្នូ។

ក្នុងអំឡុងកិច្ចពិភាក្សាជាមួយប្រធានាធិបតីប្រទេសម្ចាស់ផ្ទះលោក Biden ភាគីទាំងពីរត្រូវបានគេរំពឹងថានឹងពិភាក្សាអំពីបញ្ហាកិច្ចសហប្រតិបត្តិការលើវិស័យការពារជាតិទ្វេភាគី ជាពិសេសគម្រោងសហប្រតិបត្តិការក្នុងការផលិតអាវុធ និងប្រព័ន្ធការពារដែនអាកាស ព្រមទាំងផែនការសហប្រតិបត្តិការសម្រាប់ឆ្នាំ 2024។

នេះនឹងក្លាយជាដំណើរទស្សនកិច្ចលើកទីបីរបស់លោកប្រធានាធិបតី Zelensky ទៅកាន់សហរដ្ឋអាមេរិក ចាប់តាំងពីជម្លោះរុស្ស៊ី-អ៊ុយក្រែនបានផ្ទុះឡើងក្នុងខែកុម្ភៈ ឆ្នាំ 2022។ ក្នុងដំណើរទស្សនកិច្ចនេះ លោក Zelensky ក៏ត្រូវបានគេរំពឹងថានឹងជួបជាមួយមេដឹកនាំសភាសហរដ្ឋអាមេរិកផងដែរ។

ដំណើរទស្សនៈកិច្ចរបស់មេដឹកនាំអ៊ុយក្រែនទៅកាន់ទីក្រុងវ៉ាស៊ីនតោន ធ្វើឡើងនៅពេលដែលសមាជិកសភាអាមេរិកមិនទាន់ឈានដល់ការឯកភាពគ្នាលើវិក័យប័ត្រថវិកាបន្ថែមចំនួន 106 ពាន់លានដុល្លារ រួមទាំងជំនួយចំនួន 61.4 ពាន់លានដុល្លារដល់ទីក្រុងគៀវផងដែរ។

កាលពីសប្តាហ៍មុន ថ្លែងនៅឯសេតវិមាន លោកប្រធានាធិបតី Biden បានអំពាវនាវឱ្យសភាអនុម័តច្បាប់ថវិកាជំនួយបន្ថែម ខណៈដែលលោកបញ្ជាក់ថា លោកមានឆន្ទៈក្នុងការធ្វើសម្បទានលើសន្តិសុខព្រំដែនជាថ្នូរនឹងអ្នកសាធារណរដ្ឋអនុម័តច្បាប់នេះ។

ប្រធានាធិបតីអ៊ុយក្រែននឹងថ្លែងសុន្ទរកថាផ្ទាល់នៃកិច្ចប្រជុំសមាជិកព្រឹទ្ធសភាអាមេរិកទាំងអស់នៅវិមាន Capitol Hill និងនៅសេតវិមាននៅថ្ងៃទី 12 ខែធ្នូ។

ក្រុមអ្នកសង្កេតការណ៍បាននិយាយថា ជម្លោះដីមិនឈប់ឈរនៅភាគខាងកើត និងភាគខាងត្បូងអ៊ុយក្រែនកំពុងឈានចូលរដូវរងា ខណៈដែលប្រទេសនេះប្រឈមមុខនឹងការខ្វះខាតកងទ័ព ភាពមិនប្រាកដប្រជាលើជំនួយ យោធា និងការបែកបាក់គ្នានៅក្នុងសហភាពអឺរ៉ុប (EU)។

លោក Zelenskiy ក៏គ្រោងនឹងជួបជាមួយនាយកគ្រប់គ្រង IMF Kristalina Georgieva ក្នុងទីក្រុង Washington នេះបើយោងតាម Bloomberg ។

មុននឹងទៅអាមេរិក នៅថ្ងៃទី១០ ខែធ្នូ លោក Zelensky បានធ្វើដំណើរទៅប្រទេសអាហ្សង់ទីន ដើម្បីចូលរួមក្នុងពិធីសម្ពោធប្រធានាធិបតីថ្មី Javier Milei។ នេះជាដំណើរទស្សនកិច្ចលើកដំបូងរបស់ប្រធានាធិបតីអ៊ុយក្រែនទៅអាមេរិកខាងត្បូងចាប់តាំងពីផ្ទុះជម្លោះយោធាជាមួយរុស្ស៊ី។

ខាន់ ហុង

ប្រភព