មូស្គូ៖ អាមេរិក-រុស្ស៊ី មិនអាចសន្ទនាគ្នាបានទេ។

អនុ រដ្ឋមន្ត្រីការបរទេស លោក Sergey Ryabkov បាននិយាយដោយសំដៅលើកិច្ចព្រមព្រៀងគ្រប់គ្រងសព្វាវុធរវាងសហរដ្ឋអាមេរិក និងរុស្ស៊ី ថា "ខ្ញុំមិនគិតថានៅពេលអនាគតដ៏ខ្លីនេះកិច្ចសន្ទនានឹងត្រលប់ទៅតាមរបៀបដូចពីមុនការផ្អាកជាឯកតោភាគីដោយសហរដ្ឋអាមេរិកនោះទេ"។

យោងតាមលោក Sergey Ryabkov ទីក្រុងមូស្គូនៅតែកំពុងពិចារណាឆ្លើយតបទៅនឹងសំណើរដើម្បីបន្តការគ្រប់គ្រងអាវុធ និងកិច្ចសន្ទនាស្ថិរភាពជាយុទ្ធសាស្រ្តដែលទីក្រុងវ៉ាស៊ីនតោនបានផ្ញើកាលពីខែមុន។

កាំជ្រួចមីស៊ីលអន្តរទ្វីប RS 12M Topol របស់រុស្ស៊ី។ (រូបថត៖ Getty)

លោក Ryabkov បានសង្កត់ធ្ងន់ថា "ប្រសិនបើទីក្រុងមូស្គូសម្រេចចិត្តបញ្ជូនការឆ្លើយតបជាផ្លូវការ ទីក្រុងវ៉ាស៊ីនតោននឹងពិបាកក្នុងការធ្វើសម្បទាននៅក្នុងការសន្ទនា។

រុស្ស៊ីបាននិយាយថា ខ្លួនត្រៀមខ្លួនជាស្រេចដើម្បីពិភាក្សាជាមួយសហរដ្ឋអាមេរិកអំពីអាវុធនុយក្លេអ៊ែរ និងបញ្ហាផ្សេងទៀត ប៉ុន្តែគ្រាន់តែឈរលើជើងស្មើគ្នាប៉ុណ្ណោះ។ អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅខែនេះថា ទីក្រុងវ៉ាស៊ីនតោនគួរតែបញ្ឈប់ការបង្រៀននៅទីក្រុងមូស្គូ ប្រសិនបើខ្លួនចង់បន្តកិច្ចចរចាប្រកបដោយផលិតភាពឡើងវិញ។

អាមេរិក និងរុស្ស៊ី បានស្តីបន្ទោសគ្នាទៅវិញទៅមក ម្តងហើយម្តងទៀត ចំពោះការខ្វះខាតវឌ្ឍនភាព ក្នុងការស្នើសុំផែនការគ្រប់គ្រងអាវុធ។ កាលពីខែកក្កដា សហរដ្ឋអាមេរិកបានស្នើឱ្យបើកកិច្ចចរចាលើ "ក្របខ័ណ្ឌ" ដែលនឹងរក្សាដែនកំណត់លើការដាក់ពង្រាយអាវុធនុយក្លេអ៊ែរជាយុទ្ធសាស្ត្រ នៅពេលដែលដែនកំណត់បច្ចុប្បន្នផុតកំណត់នៅឆ្នាំ 2026 ។

កន្លងមក ទីប្រឹក្សាសន្តិសុខជាតិអាមេរិក លោក Jake Sullivan បាននិយាយថា រដ្ឋបាលរបស់ប្រធានាធិបតីអាមេរិក Joe Biden បានត្រៀមខ្លួនរួចជាស្រេចក្នុងការចរចា "ដោយគ្មានលក្ខខណ្ឌជាមុន" ជាមួយរុស្ស៊ីលើការគ្រប់គ្រង "ហានិភ័យនុយក្លេអ៊ែរ" និង "ក្របខ័ណ្ឌ" ដើម្បីជំនួសសន្ធិសញ្ញា New START បន្ទាប់ពីវាផុតកំណត់។

ទោះបីជាយ៉ាងណាក៏ដោយ ជាការឆ្លើយតប អនុរដ្ឋមន្ត្រីការបរទេសរុស្ស៊ី លោក Sergey Ryabkov បាននិយាយថា ទីក្រុងម៉ូស្គូ មិនអាចពិភាក្សាបញ្ហាគ្រប់គ្រងអាវុធដាច់ដោយឡែកពីបញ្ហាផ្សេងទៀតបានទេ។

ភាពតានតឹងដែលមិនធ្លាប់មានពីមុនមករវាងរុស្ស៊ី និងអាមេរិកបានផ្ទុះឡើង បន្ទាប់ពីទីក្រុងមូស្គូបានចាប់ផ្តើមប្រតិបត្តិការ យោធា របស់ខ្លួននៅអ៊ុយក្រែនក្នុងខែកុម្ភៈ ឆ្នាំ 2022។ ចាប់តាំងពីពេលនោះមក ទីក្រុងវ៉ាស៊ីនតោនបានដាក់ទណ្ឌកម្មយ៉ាងទូលំទូលាយលើទីក្រុងម៉ូស្គូ ហើយបានផ្តល់អាវុធ និងជំនួយផ្សេងទៀតដល់ទីក្រុងគៀវ។ ប្រធានាធិបតី Joe Biden បាននិយាយថា សហរដ្ឋអាមេរិកនឹងបន្តគាំទ្រអ៊ុយក្រែន “ដរាបណាចាំបាច់”។

រុស្ស៊ីអះអាងថា ការផ្ទេរសព្វាវុធធុនធ្ងន់ដែលផលិតដោយលោកខាងលិចទៅកាន់ទីក្រុងគៀវ មានប្រសិទ្ធភាពធ្វើឲ្យសហរដ្ឋអាមេរិក និងប្រទេសណាតូ ពាក់ព័ន្ធដោយផ្ទាល់នៅក្នុងជម្លោះ។

គង់ អាញ់ (ប្រភព៖ RT)

ប្រភព