ប្រធានរដ្ឋសភា Vuong Dinh Hue ជួបជាមួយប្រធានសភាហ្វីលីពីន Ferdinand Martin Romualdez

ក្នុងឱកាសចូលរួមមហាសន្និបាតអន្តរសភាអាស៊ានលើកទី៤៤ (AIPA-44) នៅទីក្រុងហ្សាកាតា (ឥណ្ឌូនេស៊ី) នារសៀលថ្ងៃទី៦ ខែសីហា ប្រធានរដ្ឋសភា វៀតណាម លោក Vuong Dinh Hue បានជួបពិភាក្សាការងារជាមួយប្រធានសភាតំណាងរាស្រ្តហ្វីលីពីន លោក Ferdinand Martin Romualdez ។

ប្រធានរដ្ឋសភា លោក Vuong Dinh Hue ប្រគល់វត្ថុអនុស្សាវរីយ៍ជូនប្រធានសភាហ្វីលីពីន Martin Romualdez។ (ប្រភព៖ VNA)

នៅក្នុងជំនួបនេះ ប្រធានរដ្ឋសភា លោក Vuong Dinh Hue និងប្រធានសភាតំណាងរាស្រ្តហ្វីលីពីន បានសម្តែងនូវសេចក្តីសោមនស្សរីករាយដែលបានជួបប្រជុំម្តងទៀត និងបានរំលឹកពីដំណើរបំពេញទស្សនកិច្ចប្រកបដោយជោគជ័យខ្ពស់របស់ប្រធានរដ្ឋសភា ទៅកាន់ប្រទេសហ្វីលីពីនក្នុងឆ្នាំ២០២២ ក៏ដូចជាសភាតំណាងហ្វីលីពីន ដែលបានអនុម័តសេចក្តីសម្រេចចិត្តស្វាគមន៍ដំណើរទស្សនកិច្ចនេះ។

ប្រធានរដ្ឋសភា លោក Vuong Dinh Hue បានសង្កត់ធ្ងន់លើការវិវឌ្ឍន៍ដ៏ខ្លាំងក្លាលើគ្រប់វិស័យនៃទំនាក់ទំនងដៃគូយុទ្ធសាស្ត្រវៀតណាម - ហ្វីលីពីន ជាពិសេសទំនាក់ទំនងកម្រិតខ្ពស់។

មេដឹកនាំទាំងពីរបានឯកភាពជំរុញការអភិវឌ្ឍន៍យ៉ាងសំខាន់នៃទំនាក់ទំនងទ្វេភាគី ជាពិសេសលើ វិស័យសេដ្ឋកិច្ច ពាណិជ្ជកម្ម និងវិនិយោគ ដោយខិតខំនាំទំហំពាណិជ្ជកម្មទ្វេភាគីឲ្យឡើងដល់ ១០ ពាន់លានដុល្លារនាពេលឆាប់ៗខាងមុខ។

ក្នុងបរិបទនៃស្ថានការណ៍ពិភពលោកដ៏ស្មុគស្មាញនាពេលនេះ ប្រធានរដ្ឋសភាបានស្នើថា វៀតណាម និងហ្វីលីពីនត្រូវសហការគ្នាបង្កើតខ្សែសង្វាក់ផ្គត់ផ្គង់ សម្រួលដល់ការនាំចូលទំនិញសំខាន់ៗរបស់វៀតណាម រួមមានអង្ករ សម្ភារសំណង់ ក៏ដូចជាទំនិញដែលហ្វីលីពីនមានសក្តានុពល និងវៀតណាមមានតម្រូវការ។ ភាគីទាំងពីរត្រូវពង្រឹងកិច្ចសហប្រតិបត្តិការលើវិស័យសំខាន់ៗចំនួនពីរគឺ ការផ្លាស់ប្តូរឌីជីថល និងការផ្លាស់ប្តូរថាមពល។

ប្រធានរដ្ឋសភា Vuong Dinh Hue និងប្រធានសភាហ្វីលីពីន Martin Romualdez និងគណៈប្រតិភូថតរូបអនុស្សាវរីយ៍។ (ប្រភព៖ VNA)

ភាគីទាំងពីរបន្តជំរុញកិច្ចសហប្រតិបត្តិការរវាងសភានៃប្រទេសទាំងពីរ បើកឱកាសថ្មីសម្រាប់កិច្ចសហប្រតិបត្តិការទ្វេភាគី និងពហុភាគី; ជំរុញការផ្លាស់ប្តូរគណៈប្រតិភូ និងកិច្ចសហប្រតិបត្តិការរវាងថ្នាក់ដឹកនាំ និងស្ថាប័នជំនាញនៃរដ្ឋសភា; និងផ្លាស់ប្តូរបទពិសោធន៍ក្នុងសកម្មភាពសភា។

មេដឹកនាំទាំងពីរក៏បានឯកភាពបន្តជំរុញកិច្ចសហប្រតិបត្តិការ និងការគាំទ្រគ្នាទៅវិញទៅមកក្នុងក្របខ័ណ្ឌពហុភាគី; គាំទ្រគំនិតផ្តួចផ្តើមរបស់គ្នាទៅវិញទៅមកនៅ AIPA ពង្រឹងបន្ថែមទៀតនូវសាមគ្គីភាព ភាពរឹងមាំ និងតួនាទីកណ្តាលរបស់អាស៊ាន ព្រមទាំងរក្សាសំឡេងរួមលើបញ្ហាសន្តិសុខក្នុងតំបន់ រួមទាំងបញ្ហាសមុទ្រខាងកើតផងដែរ។

ប្រធានរដ្ឋសភាលោក Vuong Dinh Hue បានស្នើឱ្យសភាហ្វីលីពីនបញ្ជូនគណៈប្រតិភូទៅចូលរួមសន្និសីទសកលនៃសមាជិកសភាវ័យក្មេងលើកទី៩ដែលនឹងប្រព្រឹត្តទៅនៅទីក្រុងហាណូយ។ ប្រធានសភាលោក Ferdinand Martin Romualdez បានបញ្ជាក់ថា លោកនឹងបញ្ជូនគណៈប្រតិភូទៅសន្និសីទ។

ក្នុងឱកាសនេះ ប្រធានរដ្ឋសភា លោក Vuong Dinh Hue បានគោរពអញ្ជើញប្រធានសភាតំណាងរាស្រ្ត និងប្រធានព្រឹទ្ធសភាហ្វីលីពីន មកបំពេញទស្សនកិច្ចនៅវៀតណាមក្នុងពេលឆាប់ៗនេះ។ ប្រធានសភាលោក Ferdinand Martin Romualdez បានទទួលយកការអញ្ជើញដោយរីករាយ ហើយបានបញ្ជាក់ថា លោកនឹងទៅបំពេញទស្សនកិច្ចនៅវៀតណាមក្នុងពេលឆាប់ៗនេះ។

ប្រភព: https://baoquocte.vn/chu-tich-quoc-hoi-vuong-dinh-hue-gap-chu-tich-ha-vien-philippines-ferdinand-martin-romualdez-237407.html